''''''
మదికి ఆకృతి నొసగినావు నీవు! ;;;;;;;;;;;
''''''''''''''''''''''
ప్రేమా!ఓ ప్రేమా!
అలసట చెందిన మనసులను
మరల మరల అలమట బెడుతూనే
ఉంటూంటావు!
ఇదేమి సరదా నీకు?
మనసున్న మనిషి అంటే
నీకెందుకనీ ఇంత అలుసు?!
"ఇంతింత"ని అనుకుంటూ
అంచనాలు వేయ లేనంతగా
'గడుసు దనాన్ని '
నిలువెల్లా
నింపుకున్న దానివి నీవు!
గాలికి
దూది పింజల లాగా
ఎగిరి పోతూన్న భావాలను
పరిమళ పుష్పాలుగా చేస్తావు!
గమ్యం ఎరుగని ప్రయాణాలలో
డస్సి పోయిన మనసులను
శ్రావణ నీరదములుగా
తొలకరింప జేస్తావు
చిలకరింప జేస్తావు నీవు,
ఓ ప్రేమా!
"మనసు"అనేది ఉందనీ
మదిని కలిగి ఉన్న జీవి
"మనిషి మాత్రమే!" అనిన్నీ
నీ వలననే నిరూపితమౌతూన్నది,ఓ ప్రేమా!
హృదయ తత్వ స్వరూపాన్ని
సదా
అవగతం చేస్తూనే ఉంటావు నీవు,ఎల్లరికీ!
అందుకే
ఓ ప్రేమ దేవతా!
నీకు మా శత సహస్ర వందనములు!
'''''''
No comments:
Post a Comment