పొందిక కుదిరిన చోట

'''''''

పొందిక కుదిరిన చోట ;;;;;; 

'''''''''''''''  

ఏ నేత్రాలకు 

"దృక్కులు" ;

దిశాంతాలకు కదలికలను నేర్పిస్తాయో ; 

ఆ నయనాలను ఆరాధిస్తాను నేను.

ఏ పాదాలకు  

కాంతి నిర్ఝరీ గమ్యాలకు తీసుకు వెళ్ళే ; 

మలుపులు తెలుసునో ; 

ఆ చరణాలకు సాష్టాంగ పడతాను నేను. 

ఏ హస్తాలు 

ఆప్యాయతలను ఆహ్వానిస్తాయో; 

ఆ చేతులను 

మనసారా కన్నులకు అద్దు కుంటాను; 

ఏ మాటలకూ,చేతలకూ 

హృదయంలో పొందికగా 

"వారధి"ని కడతారో 

ఆ మానస సరోవర కెరటాల 

హృద్యంగమ గమకములలో; 

మనసారా స్థిర నివాసమేర్పరచుకుంటాను నేను!  

''''