Wednesday, May 6, 2009

బూజం బంతి

'''''''''''







''''''  
వాసంతం వచ్చింది 
కొండ కోన ఆకు,పూలు  
అణువణువును ప్రేమ మీర 
సుతి మెత్తగ నిమిరింది //  
పొన్నాయి పూలివిగో! 
పూల జడలు అల్లండి 
కొబ్బరాకు ఈనెలు ఇవి 
బుజ్జి బుట్టలల్లండి.  
పచ్చనైన మామిడాకులు
బూరాలను చుట్టండి! 
మామిడాకు పి ప్పి ప్పీ!
ఈలలు,బూరాలూ  
ఇవి అన్నీ మీ కొరకే! 
రా రండీ!వేగిరమే! బాలలూ!"
అని అంటూ పిలుస్తూంది వాసంతము //
 
పైరు గుబాళింపుల 
బుజ బుజ బూజం బంతి ! 
గొబ్బెమ్మలు, రంగ వల్లి 
చేయండీ! బొమ్మల పెళ్ళి!  
పెళ్ళి విందు ఆటలు 
సృష్టి కర్తకు కను విందులు,ఇంపులు!  

,,,,,,,,,,,,,,,,,

Tuesday, May 5, 2009

గడసరి మనస్సు

గడసరి మనస్సు ;;;;
'''''''''''  
నా హృదయాన్ని 
ఆనంద ద్వారానికి 
తలుపుగా నిర్మించుకున్నాను  

పరిచిత భావాలను పిలవడానికి  
నీవు తలుపు తట్టినపుడు 
అఱ చేతి స్పర్శలోని మార్దవత్వం 
నా మేనుకు 
మకరికా రేఖలుగా 
చిత్రములుగా 
చిత్రంగా చిత్రించబడే మధుర అవకాశా లెపుడూ  
విస్తృతంగా ఉంటూనే ఉంటాయనే 
వాస్తవాన్ని నేను గ్రహించాననీ.....  

ఆ నా గడసరి తనాన్ని నీవు గుర్తించినపుడు 
లౌక్యముగా.... 
నీ బింబాధరాల వెనుక 
లీలగా దాక్కున్న 
నీ మందహాసాలను 
నేనుగమనించి కూడా, 
గమనించనట్లుగా నటించే  
"ఈ నా లౌక్యము"కూడా 
బహు గడసరిదే కదూ!చెలీ!  


'''''''''''''''''

తరుణి చూపులు


''''''''''''''''''''''''''''''''''''''


''''''''  
తరుణి చూపులు ;;;;;;; 
'''''''''''  

పరమ పద సోపాన పటమును పరిచేసాయి  
"ఉవిద చూపులు!  

క్రితం క్షణం దాకా  
నిదుర మత్తులో జోగుతూన్న  
"వలపు" కాస్తా 
ఒక్క ఉదటున  
మగత నిద్ర మత్తును వీడి 
రంగములోనికి జొర బడినది  
నిచ్చెనలను ఎగ బ్రాకుతు ఎక్కినా 
తోకకు దిగ జారినా  
ప్రణయ క్రీడా కారులదే గెలుపు! 

నిశ్శ్రేణులైనా, 
జంతు విక్రీడితాలైనా 
నవ్యత్వము పొందుతాయి 
"ప్రేమ రచన"లో!  


'''''''


దుత్తలోని పాలు సుధా తుల్యములు

'''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''''

''''''''''''''''



 

దుత్తలోని పాలు సుధా తుల్యములు ;;;;; 
''''''''''''''''''''''''''  

తొలి పొద్దు ఆయెను 
నీల మేఘ శ్యాముడు 
పాలు పిదుక వేం చేశాడు
గోమాతకు వందనమిడి
క్షీరములను పిదుక సాగె // 

పాల తుంపురులు తొణుకాడుచు ఎగసేను 
పాలు చింది క్రిష్ణయ్యను హత్తు కొనుగ  
నీలి మేఘఛాయపైన ముత్తెముల క్రోవలాయె. చుయ్....చుయ్......చుయ్......... //  

పాల సుధల గోపాలుడు సుతారముగ పిదుక సాగె.  
చివురు వ్రేళ్ళ తెలి గోరుల వికసించెను సూర్య రశ్మి  
నఖములపై హరి విల్లుల 
వీక్షించుచు క్షీరములు 
హర్షమ్ములు ఉప్పొంగగ 

వేలాదిగ తెలి నురుగుల 
కోట్లాదిగ ఇంద్ర ధను(వు)లు  
ఉంగరముల కురుల హొయలుల నీడల 
సొంపు సౌరభములన్నీ 
తమలోనే లీనమవగ 
దుత్తలోని పాలన్నీ  
పొంగు పాల కడలులే ఆయెను 

హరి ముంగురుల సొగసులతో 
హరి విల్లుల సొబగులతో 
పాల వడుల సుడుల వయ్యారాలు ఎన్న తరమా?



''''''''''''''''''''''''''''''''''''''''''

Monday, May 4, 2009

చెకు ముకి రాళ్ళు








''''''''  
చెకు ముకి రాళ్ళు
'''''''''''''  
విరహాల చెకుముకి రాళ్ళ నుండి ; 
విచ్చల విడిగా వెలువడుతూన్న నిప్పురవ్వల్లారా! 
పొండి! 
ప్రేమ జంటలనాగినీ క్రీడల భోగి మంటలకు ; 
miiru"ఇంధనపు పొడి"గా మారి పొండి! 

మమతాను రాగ సంక్రాంతి పర్వాల సందడిని 
ప్రేమికుల ప్రపంచములలో వెలిసేలా చేయడము
అనే "విధి",'కర్తవ్యములు ' 
మీకు మాత్రమే  
ఆచరణాత్మకంగా కల 'హక్కు 'అనీ
తక్షణమే నిరూపించుకోండి! 
ఓ చెకుముకి రవ్వల్లారా!  


'''''''

Friday, April 24, 2009

ధనువుకు పూవులు



చెలియ తెలి చూపు ఎంతటి శక్తి కలది! 
మనోజ్ఞ భావేంద్ర ధనువుల సృజియించ గలదు 
వెన్వెంటనె భావేంద్ర ధనువుల విరిచి వేయ గలదు 
తత్ శకలములు భువిని పుష్పములై వెలసెనంత! 
మదను శరములకు పూవుల కొరత లేదు, ఇంక మీద!

''''''''''''''''''''''''''''''''''''''''''''''''''''''''''''''''''''''''''''''''''''''''''''''

సంచారిణి







నా "నిదుర"
నిరంతర సంచారిణి ,

కోరి,ఎప్పుడూ
తాను 'మెలకువ ' లోనే 
చరిస్తూనే ఉంటుంది. 

అందుకనే , 
'తాను ' 
కల కాలం 
'కలల పల్లకీ' గా 
అలంకృతమవ్వాలనే 
తన అభిలాషను 
నెర వేర్చుకో గలిగింది




'''''''''''''''''''''''''''''''''''''''''''''''''''''''

నిబిడీకృతము


ఆకాశం ,ఎంత గొప్పది 
ఇందు బింబం, తారకలూ 
దిన మణి,జీమూతములు, 
గ్రహ గోళాలూ .................

ఇన్నిన్ని సొబగుల నన్నిటినీ 
తనలోనే ఇంపింపుగ 
ఇంపొదవగ, ఇంపెదుగగ తనలోనే 
ఇమిడించు కున్నది! 

ప్రేమ తత్వం 
ఎంతటి ఔన్నత్యాన్ని సాధించిన 
"విజేత" అయ్యింది! 

తనలోనే 
సర్వ సౌమ్యత్వాన్నీ 
నిబిడీ కృత మొనరించుకున్నది కదా మరి!!

స్థిర వాసము


తటిల్లత 
మేఘశకలాలలోన 
'అస్థిత్వం' కొరకు 
ఎంతెంతో యత్నించీ ,విఫలురాలు అయ్యింది. 

కడకు ఆ సౌదామిని 
సుహాసినీ! నీ మందహాసమ్మునందు 
సాధించెను 
"స్థిర వాసము".
 
ఏ చిర కాల తపమ్ము చేత 
తటాలున ఇంతటి సత్ఫలితము 
లభియించెను!తన కౌరా!

పడతీ!








పడతీ!
 

నీ పెదవులపై దరహాసము, 
శరత్ చంద్రికలకు మెరుగులు దిద్దింది. 
నిదురలో చెదరిన నీ ముంగురులను సరి దిద్దిన 
చిరు గాలికి 'పూ పుప్పొడి ' పరిమళాన్ని అద్దింది. 

'సుగంధాన్ని ,మలయ పవనానికి ప్రసాదముగా 
ఒసగినట్టి 'పుష్ప రజములకు 
వన దేవత ప్రశంసలు,మిక్కుటముగా లభించినవి. 
తరుణి హాస స్పర్శ మహిమ నిరూపితము అవుతూనే ఉంది, 
సదా 

***        ***        *** 

నీ అధరాలలోన దర హాసం పులకరించింది 
నీ కనుకొలకుల 'అలుక ' కులుకుగ తా పవ్వళించిందోహో!. 
కినుకకు మెలకువ వస్తే,అది నాకు 'కానుక 
రాకుంటే,,, 
అది,ఈ కవితా అసిధారా వ్రతమ్మునకు 
అమూల్యమౌ బహుమతి. 

***        ***        *** 

ద్రాక్ష గుత్తిని పట్టి,పండు నొకటొకటే 
కొసరుగా తింటూన్నది , 
దరహాస లావణ్యములు విరియుచూ చెలియ. 
నల్లని రేయిలో,తెల్లని జాబిల్లి,అటు వేపున, 

సుదతీ! 
నీ 'తెలి నగవు నింగి ' పైన 
నీలి ద్రాక్ష ఫలముల జాబిల్లులు,ఇచ్చట, 
ఉపమాలంకరమ్ముల వ్యత్యస్తము కూడ 
కోండొకచో శోభిల్లును, చిత్రమే!


''''''''''''''''''''''''''''''''''''''''''''''''''''''''''''''''''''''''''''''

వీణా రవళి


బ్రహ్మ లోకము నుండి 
స్వప్న పల్యంకికలో 
శ్రీ వాణి "కచ్చపి" వీణియాను 
కిన్నెరలు తెచ్చారు. 
బింభాధరి పెదవి పైన 
కదలాడెడు మధు హాసము 
నిదుర మబ్బు వీచికలలో 
సుతారముగ, సుతి మెత్తగ 
తియ తీయగ విన వచ్చెను. 
సంగీత శాస్త్రమందున 
నూతన ఒరవడుల కిపుడె 
శ్రీకారము చుట్ట బడెను. 
కొంగ్రొత్త శృతులు,గమకములను నేర్చిన 
గమ్మత్తు గీర్వాణముతో 
"కచ్చపి" దరహాసమ్ముతొ 
శ్రీ శారదాంబనలరించగ 
మరాళమ్ముపైన తాను 
వయ్యారముగా వెడలెను!


























బ్రహ్మ లోకము నుండి 
స్వప్న పల్యంకికలో 
శ్రీ వాణి "కచ్చపి" వీణియాను 
కిన్నెరలు తెచ్చారు. 
బింభాధరి పెదవి పైన 
కదలాడెడు మధు హాసము 
నిదుర మబ్బు వీచికలలో 
సుతారముగ, సుతి మెత్తగ 
తియ తీయగ విన వచ్చెను. 
సంగీత శాస్త్రమందున 
నూతన ఒరవడుల కిపుడె 
శ్రీకారము చుట్ట బడెను. 
కొంగ్రొత్త శృతులు,గమకములను నేర్చిన 
గమ్మత్తు గీర్వాణముతో 
"కచ్చపి" దరహాసమ్ముతొ 
శ్రీ శారదాంబనలరించగ 
మరాళమ్ముపైన తాను 
వయ్యారముగా వెడలెను!