దివ్య ధాత్రి

(భావ కవిత్వమునకు ఆద్యుడు,శ్రీ దేవులపల్లి కృష్ణ శాస్త్రి.

సంస్కృత సమాస భూ'యిష్టమైన ' ఈ పాట కృష్ణ శాస్త్రి కలము నుండి జాలు వారినది.

జాతీయ గీతముగా ఎన్నుకో వలసినంత గొప్ప స్థాయిలో ఉన్న ఈ దేశ భక్తి గీతిక,అంటే,నాకు చాలా ఇష్టము.)

జయ జయ జయ ప్రియభారత!

జయ జయ జయ ప్రియ భారత-

జనయిత్రీ దివ్య ధాత్రి !

జయ జయ జయ శత సహస్ర -

నర నారీ హృదయ నేత్రి || జయ ||

(మాకు ప్రియమైన భారతమాతా, దేవభూమీ, నీకు జయమగు గాక ! లక్షలాది స్త్రీపురుషుల హృదయాలకు కనులవంటి దానా, నీకు జయమగు గాక !)

జయ జయ సుస్యామల -

సుశ్యామ చలచ్చేలాంచల -

జయ వసంత కుసుమలతా-

చరిత లలిత చూర్ణకుంతల -

జయ మదీయ హృదయాశయ -

లాక్షారుణ పదయుగళా || జయ ||

(శ్యామలవర్ణా, కదలెడు ముదురు ఆకుపచ్చ చెరగు గల దానా, నీకు జయమగు గాక ! వసంతకాలములో విరిసిన పూలను తురిమిన అందమైన వెండ్రుకలు గల దానా నీకు జయమగు గాక ! (నా మనసునందలి అభిలాషల ఎర్రని లత్తుకతో అలంకరించబడిన పాదములు గలదానా నీకు జయము !)

జయ దిశాంత గత శకుంత -

దివ్యగాన పరితోషణ -

జయ గాయక వైతాళిక-

గళ విశాల పద విహరణ-

జయ మదీయ మధురగేయ-

చుంబిత సుందర చరణ || జయ ||

(దిశాంతములకు వెళ్ళిన పక్షుల అమరగానముతో తృప్తి బొందిన దానా, జయము! గాయకుల, కవుల కంఠములలో వెలువడు పాటలలో విహరించుదానా, జయము ! నా మధురగానముతో ముద్దుపెట్టబాదిన చుంబించిన } అందమైన చరణము గల దాన,

(ఇక్కడ పాట చరణము, తల్లి పాదాలు రెంటికి వర్తిస్తుంది) నీకు జయమగు గాక !

ఇందులో నాకు నచ్చిన ఒక పదము "చూర్ణకుంతల".

వెండ్రుకలను మధ్యలో రెండు పాయలుగా చేసి భుజములపై వేలాడదీయుటను చూర్ణకుంతల అంటారు. గర్భవతులు ఇలా అలంకరించుకోరు.

ఈ ఉద్దేశములో కవి వాడారో అన్నది నాకు తెలియదు. కాని ఇది ఒక సుందరమైన ప్రయోగము.

(విధేయుడు - మోహన )

http://www.kanneganti.com/ _______