ఆమోదము ఆ " మోదము"

ఏ వేళల నందైనను -ఆమోదము ఆ " మోదము"

సమ్మోదకరమే సతతం ఆ పరవశము ||

ముకుళిత హస్తమ్ములతో శత కోటి వందనములు

సకల లోక ఏలికకు – మది పుష్పము నొసగు నప్పుడు

అకలంకం మోదమిది – అనుభవైక వేద్యమౌ

ఆ తన్మయ ,భక్తి పారవశ్యమ్ములు

ఏ వేళల నందైనను -ఆమోదము ఆ మోదము ||

బృందా వన వినోదికి దవనాలు, మరువాలు –

నవ రస భరితము ఎపుడూ- వనజ నాభు గాథలు

ధవళ తేజో మూర్తి ,దరిశనమున తరియించగ

ఆ తన్మయ ,భక్తి పారవశ్యమ్ములు

ఏ వేళల నందైనను -ఆమోదము ఆ మోదము ||

కనక చేల ధారికివే – కనకాంబర హారములు

వారిజాక్షు మ్రోల నివే – పారిజాత సుమ కోటి

జగముల నలరించు వాని కివే అలంకారములు

మా నయనమ్ముల కోవెలల కొలువుండుము స్వామి!

ఏ వేళల నందైనను -ఆమోదము ఆ మోదము ||

(ఆమోదము ఆ " మోదము")